2016/11/20

Joseba eta ni. Ni eta Joseba.


Azaroaren 20 honetan mundu osoa dabil bolo anekdotaz, denek bazenekiten Joseba Sarrionandia Kuban zela, askok dute koadrilako bat oporretara joanik han topo egin duena idazlearekin ostatu bateko terrazan, anitzek dute lagun baten laguna berekin harremanetan jarraitu duena. Noski.
Haize hegoak edozein jo baitezake. Orok du existentzia.

E be, goazen! Nik ere badut ene istorioa Josebarekin.
Azken 15 urteak bederen iraganak baititu ene etxean.
Elkarrekin bizi gara.

2016/11/10

Aitaren etxean tipula mozten

Defendituko dut aitaren etxea.
Hitz horiek xuxurlatu zizkigun olerkariak duela aspaldi eta guk sinetsi ta bete.
Haatik lehenagokoek norenganik zuten etxea, aita ala amarenganik, ez dugu gehiago gogoratzen. Bakarrik aitaren etxea defendatu behar dugula.

Euskal Herrian azken mende erdian gertatuko zen horrarte egundaino gertatu ez zen aldaketa, iraultza, borroka, kalapita eta gora behera paketa. Ekologistak, komunistak, sindikalistak, feministak, gazteak, anarkistak, denak pasatu ziren beren aldarikapen, ideia eta ereduekin. Gure aitaren etxeak, azken hiruroigei urteetako gertakarien bonbardaketaren ondotik segitzen omen du xutik. Haatik, defenditzen dugun etxeak ez dakit gehiago zer duen ikustekorik olerkariak aipatzen zuen harekin.

Baina ez gaitezen larri.
Aitaren etxea xutik da, bai, zenbait horma, teilatu puska bat dilindan. Eta bi gela : logela, noski, nola ez, eta sukaldea.
Eta sukaldearen erdian, emazte bat. Emazte bat, xutik, Aitaren etxearen erdian, bakarrik, sukalde izkin batean, tipula mozten ari.










Argazkia: Oignon à l'ail by Prisme06

2016/07/09

izena eta izana



Ostirala izatearren, egun ederra da honaino. Arratsaldeko lauak eta erdiak dira. Oraindik bulegoan zaude, gatu zahar bat bezala.

Ikasle-/-profesionalak

Ene azken post-ean aipatu nuen luze eta zabala ikasturte honetako esperientzia profesional gaitzak zituen onura guziak, baina ez nuen deus aipatu ikasleen ikuspegitik nahiz gizarte zabalarenetik atera daitekeen ondorio multzoa.

Ikasle batzuk egon dira euskara ikasten sei hilabetez. Oinarrizko maila (B1) lortu artean eta lanpostu euskaldunetan eskas den langilegoaren parte izateko nahikaria eta konpromisoarekin. Gehienek aurreikusi maila lortu dute. Batzuek jada lana atxeman dute.

2016/06/23

Inarrosaldia

San Joanak etorri dira, ikasturtea erre eta lurperatzeko garaia eta enetako aurtengo irakasle taldearekin burutzekoa zen azken koordinazio bilkuraren eguna.

Ez da dudarik, urte betean ene lanaz idatzi ez badut ere hemen, gaitzeko esperientzia izan dela ikasturte oso hau. Didaktika alorrean eta euskalduntzearenean lan egiten duen orok, noizbehinka, behar lukeen astinaldia izan da, zeren argiki erran dezadan, ikasturte honetan sekulako inarrosaldia bildu dut, zaplastakoa, ene segurtasun guztiak irauli dituena, izerdia botarazi didana eta intentsitatea zela-eta "xuri" batzuk ikusarazi dizkidanak noizbehinka.

2016/06/14

:arr(hotz)

Semea negarrez utzi dut, futbol eurokoparen karietara bazter guztietan banatzen dituzten frantses bandera horietarik bat etxera eramateko hartzea galarazi diodalarik.
Eskainiak dira, dohain, irribarre inozente batekin. Eta nik ukatu.

2016/05/21

"Je ne puis pas donner la réalité des faits, je n'en puis représenter que l'ombre ... je vois des images, je me souviens des effets sur mon cœur." 
Stendhal

Txontxongiloa

Txontxongilo bat da haur aulki batean jarria. Aulkia espreski du beretzat. Inozentzia kotsia aireratzen du.
Txontxongilo guziek bezalakoa da: ez da “ederra”, ez du gorputz harmoniatsua, inperfekzio zenbait baitute ardura, batzuetan bat baino gehiago, agian horrek ditu gure eitekoak bihurtzen: begi bat makurra, itxura potoloa, matelak gorriegi, jantzi oihala modaz pasatua.

2016/05/20

Eta nehor ez whatsapp-en

Gaur hona itzultzeko gogoa ukan dut, zutabe honetara berriz jiteko, auskalo zergatik.
Gaur ostiraletako usaiako zereginez aparte, ez dut deus berezi egin, salbu ileak moztera joan naizela.

Egiaz, gaur konkretuki ez da deus berezi gertatu, ez bada azken hilabeteetan ohi baino denbora luzeagoaz sozializatu naizela supermerkatuan (bai, ene sozializazio leku printzipal eta bakarra da, kentzen bada ikastolako ataria zeinetatik tarrapatan eskapatzen naizen ardura).

2016/03/12

Eraikitzen ari dira


Aspalditik ez genuen entzuna deus haietaz, direla lehengusu, direla auzoko, direla edozein herritar edo ezagun, garai batez gehiago aipatzen ziren, agertzen, karrika nahiz bazkari nahiz aipamenetan. Eta hala non solas baten artekatik azaldu diren berriz. Bat-batean, aurre abisurik gabe. Zer bilakatu dira?

- Ils construisent.