2017/12/02

Txontxongilo dantza

Gaurko egunak ere bere sorpresa ekarri du.
Azken bizpahiru asteak eraman dituzte gure ikasleak txontxongilo antzerki bat lantzen, ondotik publiko aurrean ematekoa.

2017/12/01

Euskara hankekin

Gaur eguna sobera fite joan da eta berandu da jada idazten jartzen naizenean.
Hala ere bosgarren eguneko anekdota labur bat bederen zor dut, ene buruari baizik ez bada ere.

Ostiraletan goizago joaten naiz haurren xerka. Saiatzen bederen. Parada da beste guraso batzuekin, usaiakoak ez direnak eta beti portalera goiz heltzen direnen kurutzatzeko.
Anitzek, usaian baino gehiagok, agurtu naute irribarre batekin, euskaraz, eta astea ea nola iragan den galdetuz. Eta gero mila gauzez aritu zaizkit. Erran behar zuten. Edo holako zerbait senditu dut. Mintzatzeko gogo bat.
Senditu naiz ene ohiko hartarik bestalde. Ez bakarrik nitaz ukan ohi dudan irudia. Beste zerbait...
Ez da lehen aldia. Beste batzuetan ere sentiarazi didate maiz. Gustura utzi izan nauen jokamoldea da. Asetzen duena. Batzuetan pisu ere izan daitekeena baina gaur ez.
Sentitu naiz, sentiarazi naute, euskara hankekin ikastolaren inguruan paseatzen.

2017/11/30


Gaur laugarren eguna dut kronika honetan, laugarrena ene Ahobizi esperientzian.

Irudikatzeko sentitzen dudana, aipamena eginen diot hemen holako gauzak azaltzen ni baino anitzez trebeagoa den Koldo Izagirreri, hona ekarriz bere “Autopsiarako Frogak” saiakerako pasarte bat:

2017/11/29

Juduak bezala. Edo ez.




- A: vous mettez une étoile comme les juifs?

Gaur ene lehen pasarte korapilatsua bizi izan dut. Eta pareko mutur saldari azaldu diodanean zertan zen BAM dinamika, zenbat ginen, zein zen gure helburua, ene tertulia dibulgatiboa moztu du aurrekoak, irri trufakor batean botaz, juduen pare ezartzen genuela izar bat. Hots, gure euskaldun patua afitxatzen dugula miserableki.
Beharrik, eskafandra soinean ateratua nintzen! Herri honetan ez baitu sekulan atertzen!

2017/11/28

Kondizionatuak

Gaur BAM ekimenaren bigarren eguna izan da.

Errutina dela erratea gehiegizkoa litzateke. Baina kuraia handiarekin ekin diot gaur ere. Kuraia baino poz handi bat. Zerbait handi egitera doanak sendi lezakeenaren antzekoa.

Bada harrigarria noraino barneratua dugun gure nahiak ezinak direla. Kondizionatuak izan gabe zuzenean, suabeki txertatu zaigun/diguten kontzeptua da: euskaraz aritzean zein erraz zaigun heltzen inpresioa gure lekuan ez gaudela, nahasten gabiltzalako inpresioa zein fite ematen diguten. Hala konfirmatu dit auzoko okindegiko saltzaileak, atzoko berberak, begiradarik ere ez didanean zuzendu “egunon” batean hasten entzun nauen momentutik.

2017/11/27

Salto pizinara

Goiz honetan ene txapa jantzi dut ene lagunek bezala eta atera naiz karrikara.
Ximiko bat egin dit, dardara txiki bat bihotzean. Nahiz eta egunak diren jada soinean eramaten dudala ene seinale liranja, gaur izan da egun handia, azken sei hilabeteetan amestua. Beste 800 kide izan dira ni bezala salto egin dutenak pizinara.

2017/11/05

Hobeki zen lehen



- "Hobeki zen lehen!"


Solasen erdian batek bota du.
Bai, botaia da, erranaldia, erretorikoa, dioena baino zerbait gehiago salatzen duena eta elkarrizketa oro antzutzen.
Bota duena paternalista izan daiteke, kutsu erreakzionariokoa. Hala ondoriozta daiteke ez balitz hori baino konplexuagoa.

2017/06/28

Atorra lepo laxoa

Jada atorra lepo laxoa zen doia eta botoi bat gehiagok amore eman duke. Enbor erdia agerian geratu da.

Ondotik ez da deus gertatu.

2017/06/20

Seaska latza da

Ez da munduan, pertsona batek bizi litzakeenen artean gauza gogorragorik haur galtzea baino.
Dela bapatean, dela oinazeen ondotik, dela ezbeharrez, dela gaitzez, dela sortu aitzinetik, dela adinean aitzina joanik.
Ingurukoek nahi eta ahal dena eginik ere ez dute sekulan hori ez ahantzaraziko, ez eztituko, ez arinduko.
Zama daramanarentzat, oinaze perpetuala da. Beste denak inutil bihurtzen dituena.
Sufrimendu fisiko eta moral guzietatik haratago,
Zure bizia izan zitekeenari pentsatzera baino
zure bizia sekulan izanen ez denari pentsatzera eramaten baitzaitu.
Desesperatuki.

E.ri, badakigulako eta ezin deus

Kantua: Seaska (letra: M. Zubeldia / kantua: Unama taldea)


2017/05/02

Euskaraz (20): bazterketa

Aurreko sarrera aipatzen hasi nintzen Euskara, Herri Urrats-eko bideoa eta bazterketaren gaia.

Gaurko egunean bazterketa salatzen da. Homosexualek salatzen dute, emazteek salatzen dute, langile xumeek salatzen dute, miserian direnek salatzen dute, irakasleek salatzen dute, beltzek salatzen dute. Euskaldunek ere noiz behinka, kanpaina zenbait hor denean horretarako, lekukotasunak plazaratzeko eta lorpen zenbaiten zerbitzuko.

Ni hunki ninduen arras (H)aizu kantuaren bideoak.
Ene burua ikusi bainuen ene biziaren hainbat momentutan: haur denboran, unibertsitatean, lan munduan, eta gaur ere nonahi. Gainera, ikusarazi baitzidan ere ene burua: zein laster etsi naitekeen edo utzikeriara lerra.

Bazterketa - Herri Urratseko kanta-bideoa

Hastapenean, aurtengo Herri Urratsen kantua entzun nuenean, hitzen haritik izigarriko samina eta erresumina sentitu nituen. Baina hori bideoa ikusi baino lehenago zen. Gero ikusi nuen bideoa eta hor trantsiturik gelditu nintzen.