2022/05/21

Kuraia

Kuraia, maiz, ez dugun hori da.  

Aipagai dugunean, anitzetan senditu nahi genukeen haren inbokazioa da. 

Gauzen erraiteko kuraia, gauzen egitekoa ordu deno, eta justuki ez duguna. 

Faltan dugun kuraia, ezetz erraitekoa, aski erraitekoa, dena aldatzekoa, isilik jasatekoa ere. 


Alta, bestalde, eta beharrik, bada besteen kuraia. 

Haiek ere soberan ez dutena batzuetan

eta beste batzuetan, beharrik, dutena. 

Besteen kuraia, 

guhaurrengan atxeman ezina, 

haien baitan gertatzen dena,

nahigabe, 

gogoz kontra, 

edo halarik ere. 


Zorionez, adoretsuak adoretsu izan daitezke, 

haien buruaren kontra eta kaltetan barne. 


Kuraia,

besteena,

besteen kuraia, 

zeinen menpe bizirauten dugun.




2020/04/03

Goizalde beltzarana - Franck Pavloff

(Matin Brun   deitu Franck Pavloff-en ipuin laburraren itzulpena) 

Bideoa: Un Beau Matin - Serge Avédikian


Hankak luzaturik, eguzkitan, Charlie eta biek ez genuen egiazki hitz egiten, gogora punpeka zetozkigun gogoetak trukatzen genituen, besteak bere aldetik kontatzen zuenari kasu gehiegi egin gabe. Une atseginak ziren, kafea edanez iragaten genituenak, denbora luzatzen utziz. Txakurra xixta arazi behar izan zuela erran zidanean, kontuak harritu ninduen, besterik gabe. Gaizki zahartzen den ora beti da tristea, baina hamabost urteren buruan, goiz ala berant hilen dela gogoan izan behar da.

2019/07/23

Hendaian enbata



Sokoburun enbata altxatzen hasi da, sapa artetik, Jaizkibelen bestaldetik gora jina. Handik datorren guziaren gisa, menderagaitz, hezigaitz eta sukartsua dator, Guadalupe iluntzen duela.

Dagoeneko, txoriek aspaldian dute alde egina, turistek bezala funtsean, portuko itsasontzien masta kaskoetan jo morse sokorri kodeek haizaturik, baina zuk hor jarraitzen duzu, temati.

2019/05/05

Urruneko deia


Ene telofono kontaktuen zerrenda errepasatzean, ohartu naiz zenduak direnen zenbakiak ez ditudala ezabatzen, hor segitzen dutela ad aeternam.

Norbaiten kontra kexatzen banaiz, zenbakia ezabatzen dut. Gupidarik gabe. Aitzin, hala ere, paperezko errepertorioan notatzen dut, badaezpada, inkasean noizbait barkatuko banio edo, eskura izateko gisan.

2019/05/02

Hurrup eta pitz


Txokolate esne kikarakada irakina ezpain ertzean, hats-bete hagun zuhail hurrupatzeak jende arteko bakardadea piztu dio iheslariari eta bere baitarako leihoa zabaldu.
Zintzurrean irristatu zaio isurki bero gizena,
papoan beherako bidean sumindura.

2019/04/22

Euskal herritar eskola


Hikhasi aldizkarirako kolaborazioa
234 zenbakia - 2019ko urtarrila


Haurrak ikastolan ditut, eskola euskaldun eta euskal herritarrean eta aitortu beharra dut harro naizela horretaz, euskaraz ikasi ahal izateaz gain, ene haurrek Euskal Herriaz ere ikasiko dutelako, geografiaz, historiaz, literaturaz, musikaz, ohiturez, denaz.

2018/07/12

Tabula rasa

Hastapeneko intentzioa eguerdiko zerbait erostera joatea zen. Zerbait ez ohizkoa, usaiako bezperako ondar moldatuen ontzikadari pentsa araziko ez zuena. Biharamunean bakantzak izanen ziren, bazkari txukun bat merezi zuen kontuak.

2018/04/01

Itsasoa lekuz aldatzen

Elkar Fundazioak Siadeco enpresari manatu inkestaren ondorioen analisiak irakurtzen ari nintzela gaurko Berrian, hemen eta hor, gogora etorri zait gure haurrek etengabe burutzen duten jokoa: itsasoa lekuz aldatzearena.

Haurrek beti ukaiten dute sasoia zeinetan aritu behar duten “itsasoa lekuz aldatzen”, berdin dio zein belaunaldi den, elkarren artean hitzartua duten ala ez, guziek sendi dute noizbait gogo hori, baldetaraka itsasoa hustu eta egin duten zilo batera ekartzeko, itsaso berri baten sortzeko.

2017/12/02

Txontxongilo dantza

Gaurko egunak ere bere sorpresa ekarri du.
Azken bizpahiru asteak eraman dituzte gure ikasleak txontxongilo antzerki bat lantzen, ondotik publiko aurrean ematekoa.